Zientzia, Teknologia eta Berrikuntzaren XXIII. astearen inaugurazioarekin batera, Naiderrek aukera izan du Eusko Jaurlaritzako Aholku Batzorde Zientifikoaren lan-saio bat dinamizatzeko. Saio horretan, Euskadik Europako Batzordeak egindako Innovation Scoreboard eskualdearen (RIS) rankingean duen posizioarekin lotutako hainbat alderdi jorratu ditugu.
RIS 2023 txostenaren arabera, Europako 239 eskualdetan 72. lekuan dago Euskadi, “eskualdeko bikaintasun-polo” izendapenari eutsiz. Lan-saioan, Aholku Batzorde Zientifikoko kideekin batera, Euskadiren emaitza xehatuak aztertu ditugu, lau dimentsio handiren inguruan: esparru-baldintzak, inbertsioak, jarduera berritzaileak eta inpaktuak.
Azterketa horren ondorioz, Batzordeak gomendio batzuk zehaztuko ditu, datozen urteetan hedatuko diren I+G+b politikak orientatzeko, bai eta Euskadik RISean duen posizioa hobetzeko proposamenak ere.
Horrela, Naiderren Aholku Batzorde Zientifikoaren lana babesten ari gara, lan-saioetarako dokumentazioa prestatuz, horiek dinamizatuz eta sortzen ari diren ekarpenak jasoz, aipatutako gomendioak eta proposamenak definitzeko.
Honako hauek osatzen dute Aholku Batzorde Zientifikoa: Javier Aizpurua, Materialen Fisika Zentroko (Bikaintasuneko Ikerketa Zentroa) irakaslea; Ane Aranzabe, Teknikerreko Teknologiako zuzendaria eta zuzendariorde nagusia; Iñigo Martínez de Marañón, Food Technology, AZTIko zuzendaria; Oihana Otaegui, VICOMTECHko Garraio eta Segurtasun Alorreko zuzendaria; Maria Vallet, Kimika Ez-organikoko ikertzaile eta katedraduna eta Madrilgo Unibertsitate Konplutentseko Farmazia Fakultateko Kimika Inorganiko eta Bioinorganikoko Saileko zuzendaria; María José Sanz, Basque Centre for Climate Change (BC3) Bikaintasuneko Ikerketa Zentroko (BERC) zuzendari zientifikoa; Nuria Gisbert, CIC energiGUNE Elkarlaneko Ikerketa Zentroko zuzendari nagusia; Mar Mendibe, Biobizkaia Osasun Ikerketako Institutuko zuzendari zientifikoa; eta Juan José Gómez Cadenas, Donostia International Physics Centerreko (DIPC) Ikerbasque irakaslea.
