Azaroaren 3tik 5era, Jokin Etxebarria NAIDEReko Ekonomia eta Berrikuntza koordinatzailea eta Jaume Torrents NAIDERen Kataluniako koordinatzailea Bartzelonako Smart City Expo World Congress biltzarrean izan ziren. Topaketak hiri-eraldaketari, etxebizitzari eta klima-ekintzari buruzko esperientziak ezagutzeko aukera eman zuen, hiriek partekatzen duten erronka bati arreta berezia eskainiz, beren estrategiak gauzatzeko behar duten finantzaketari.
Saioetan behin eta berriz landutako gaietako bat hiri-agenden asmoen eta horiek gauzatzearen arteko arrakala izan zen. Arrakala hori gainditzeko, ezinbestekoa da ikuspegi argia, proiektuen egituraketa eraginkorra eta emaitzen neurketa zorrotza uztartzea. Jarduketak zehazteaz gain, nola finantzatuko diren, haien garapenean nork parte hartuko duen eta zer eragin lortu nahi den argitu behar da.
Ikuspegi horren adibide bat BLOSSOM proiektua da, Europar Batasunak Horizon Europe programaren bidez finantzatua eta The Lisbon Council erakundeak koordinatua. Ekimenak tokiko eta eskualdeko administrazioak finantza-erakundeekin lotzen ditu, klima-aldaketara egokitzeko eta hura arintzeko inbertsioa erakar dezaketen irtenbideak garatzeko. Ekimenek finantzaketa-bide bat aurkitzea eta gauzatzeko urratsak egitea erraztea du helburu.
HOWS Barcelona topaketako saioetan etxebizitzaren eta hiri-eraldaketaren arteko loturak ere landu ziren. Besteak beste, etxebizitza-eskaintza nola handitu egungo bizilagunak lekualdatzera behartu gabe eta birgaitzea, espazio publikoa, zerbitzuak eta parte-hartzea nola uztartu aztertu zen, auzoetako bizi-baldintzak hobetzeko.
Eztabaida horiek agerian uzten dute plangintza, baliabideak eta erakundeen, enpresen eta herritarren arteko lankidetza lotzeko beharra. Finantzaketa hiri-erabakien parte izan behar da hasieratik, helburu argiekin eta emaitzak ebaluatzeko mekanismoekin.
NAIDERen administrazioei laguntzen diegu ibilbide horretan, beren estrategiak finantzaketa-bide errealista eta emaitza neurgarriak dituzten jarduketa bihur daitezen. Bartzelonako bisitak gure erreferentziak eta esperientziak zabaldu ditu, hirien eta lurraldeen eraldaketa bultzatzen jarraitzeko.
