NAIDER Beterri-Buruntzako Mankomunitateari laguntzen ari da eskualdeko enpresen artean ekonomia zirkularra bultzatzen, banakako diagnostikoak, ekintza-planak eta lankidetzarako eta industria-sinbiosirako aukera berriak uztartuz.
Hernanik, Lasarte-Oriak, Andoainek, Astigarragak, Usurbilek eta Urnietak osatzen duten Beterri-Buruntza eskualdeak industria-tradizio handiko enpresa-ehuna du, bai eta askotariko ekoizpen-jarduerak ere. Ingurumen-eskakizunak handitzen, baliabideen kostuak aldatzen eta hornikuntza-kateak erronka berriei aurre egiten ari diren testuinguru honetan, ekonomia zirkularra enpresa-lehiakortasuna hobetzeko aukera da, bai eta ekoizpen-eredu eraginkorrago eta jasangarriagoetarantz aurrera egiteko bidea ere.
Testuinguru horretan, NAIDER ekonomia zirkularreko proiektu estrategiko eta operatibo bat garatzen ari da Beterri-Buruntzako Mankomunitatearentzat, azken urteotan eskualdeko enpresak ezagutzeko eta aztertzeko egindako lanei jarraipena emanez. Ekimenaren helburua da baliabideak optimizatzeko, ekoizpen-prozesuak hobetzeko eta enpresen arteko lankidetzarako aukerak identifikatzea, industria-ehunaren banakako beharrak eskualdeko garapen ekonomikoaren ikuspegi partekatu batekin lotuz.
Proiektuaren abiapuntua lurraldearen egitura ekonomiko eta produktiboaren azterketa da, eta arreta berezia jartzen die material-fluxuei, baliabide-kontsumoari eta hondakin-sorkuntzari, bai eta balio-kateetan dauden aukerei ere. Diagnostiko hori enpresekin eta eragile estrategikoekin zuzenean kontrastatuz osatzen da, erronka eta jarduera-eremu nagusiak identifikatzeko.
Lanaren ardatz nagusietako bat eskualdeko gutxienez hamar enpresari banakako laguntza ematea da, CICLO aplikatuz, hau da, NAIDERrek garatutako ekonomia zirkularreko diagnostiko- eta plangintza-metodologia. Prozesu horri esker, enpresa bakoitzaren heldutasun zirkularra ebaluatu eta ekintza-plan zehatzak definitu ahal izango dira, eraginaren eta bideragarritasunaren arabera lehenetsitako hobekuntza-neurriekin.
Horrez gain, proiektuak dimentsio kolektibo bat ere badu, enpresen arteko lankidetzarako eta industria-sinbiosirako aukerak identifikatzera bideratua. Lan-gune partekatuen bidez, sinergia posibleak aztertuko dira azpiproduktuen aprobetxamenduari, hondakinen balorizazioari, materialen optimizazioari eta baliabideak eta zerbitzuak partekatzeari lotuta.
Bi ibilbideen emaitzak eskualdeko bide-orri batean bilduko dira, eta bertan lehentasunezko jarduera-ildoak, inplikatutako eragileak eta jarraipen-mekanismoak ezarriko dira. Lana, gainera, bistaratzeko eta monitorizatzeko tresna digitaletan oinarrituko da, identifikatutako ekimenen jarraitutasuna errazteko.
Helburua da erronkak identifikatzetik irtenbide zehatzak martxan jartzera igarotzea, enpresen gaitasunak indartuz eta Beterri-Buruntzan industria zirkularrago, lehiakorrago eta erresilienteago bat lortzen lagunduko duten lankidetza-dinamika berriak sustatuz.
