LOTU proiektua gaur abiatu da Oarsoaldea Garapen Agentziaren bulegoetan, helburu zehatz batekin: Oiartzun, Lezo eta Errenteriako zazpi industria-ETEk bakoitzak bere ekonomia zirkularreko proiektua garatzea, eta taldean egitea. Ekimenak Eusko Jaurlaritzaren Industria, Trantsizio Energetiko eta Jasangarritasun Sailaren dirulaguntza jaso du, ekonomia zirkularreko berrikuntzarako 2026ko laguntza-deialdiaren barruan (3. lerroa: ETE Zirkularra).
Oarsoaldeak bitartekari-agente gisa sustatu eta koordinatzen du proiektua, Ihobe erakunde laguntzailea da, eta NAIDERretik laguntza teknikoa ematen dugu. LOTUk BIRATUri ematen dio jarraipena: 2024an, Oarsoaldearekin batera, eskualdeko 30 enpresak ekonomia zirkularrean zuten egoera aztertu genuen. Parte hartzen duten zazpi enpresetatik bost diagnostiko hartan izan ziren.
Lana bi fasetan antolatzen da. Abendura arte, NAIDERreko taldeak enpresa bakoitza bisitatuko du, urriaren 13tik aurrera, CICLO tresnarekin zirkulartasun-diagnostikoa egiteko eta Ihoberen 3C kalkulagailuarekin karbono-aztarna kalkulatzeko. Informazio horrekin, enpresa bakoitzarekin batera gutxienez bost ekintzako bide-orria prestatuko du. Prozesu horretatik aterako da enpresa bakoitzak, zuzendaritzaren oniritziarekin, aukeratuko duen proiektua.
2027ko urtarriletik maiatzera, enpresa bakoitzak bere proiektua garatuko du, gure laguntzarekin. Abiapuntuko ildoen artean daude deskarbonizazio-planak, bizi-zikloaren analisia eta ekodiseinua material birziklatuarekin, injekzio-hondarrak berreskuratzea edo ontzi berrerabilgarriak. Aldi berean, talde-saioetan esperientziak partekatuko dira eta enpresen arteko sinergiak landuko.
Proiektuaren izenak berak adierazten du dimentsio partekatu hori. Enpresek ez dute balio-kate bera osatzen, baina katebegiak partekatzen dituzte: materialak, bezeroak eta erronkak. Horri esker, enpresa baten hondakina beste baten lehengai bihur daiteke. Hauek dira parte-hartzaileak: Mausa 3D (fabrikazio gehigarria), Saizarlan (termoplastikoen injekzioa), Plásticos Clossa (injekzio teknikoa), Diker (mikro-injekzioa), Fundiciones Aizpurua (brontze- eta letoi-galdaketa), Ariona Pools (igerilekuetarako iragazkiak) eta Labei Cosmetics (kosmetika naturala).
Emaitzak 2027ko maiatzean aurkeztuko dira, eskualdeko enpresa guztiei irekitako jardunaldi publiko batean.
